فوڈ پانڈا نے 'پانڈا فلائی' ڈرون سے فوڈ ڈیلیوری کے آزمائشی منصوبے کا آغاز کردیا
اسلام آباد، 12 نومبر، 2021۔ پاکستان کی سب سے بڑی فوڈ ڈیلیوری کمپنی اور ملک کے صف اول کے ای کامرس پلیٹ فارم، فوڈ پانڈا (foodpanda)نے خصوصی ڈرون طیارے سے کھانے کی فراہمی کے آزمائشی مرحلے کا آغاز کردیا ہے۔ ڈپٹی کمشنر اسلام آباد کے آفس کے تعاون سے ڈرون کی آزمائشی سروس 'پانڈا فلائی' (Pandafly) ایف 9 پارک اسلام آباد میں سرانجام دی گئی۔ اس سلسلے میں فوڈ پانڈا کے رائیڈر نے پارک کے ایک کونے پر ریسٹورنٹ سے ڈھائی کلو وزنی کھانے کا آرڈر وصول کیا اور ڈرون کے اسٹوریج بیگ میں رکھ دیا۔ اس پیکیج کو پھر ڈرون کے ذریعے پارک کے دوسرے کنارے پر پہنچایا گیا جہاں دوسرے رائیڈر نے اسے وصول کیا اور فلاحی ادارہ سویٹ ہومز کی جانب سے مدعو بچوں میں کھانا تقسیم کیا گیا۔
فوڈ پانڈا کی جانب سے مستقبل میں اس جدت انگیز ٹیکنالوجی کے استعمال کا واضح مطلب ہے کہ طویل فاصلے پر کھانے کی ڈیلیوری زیادہ تیز رفتاری سے ممکن ہوسکے گی۔ خاص طور پر دور دراز اور منسلکہ علاقوں میں رہائش پذیر صارفین اس سہولت سے فائدہ اٹھائیں گے کیونکہ ان کے پاس مقامی سطح پر فوڈ آؤٹ لٹس کے محدود آپشنز تھے، لیکن اب ڈرون ڈیلیوری کی بدولت وہ شہر کے مرکزی مقامات سے بھی کھانے کا آرڈر دے سکتے ہیں۔ صارف کے نزدیکی علاقے میں موجود فوڈ پانڈا کا رائیڈر ڈرون سے آرڈر وصول کرکے اسے صارف کے گھر تک پہنچائے گا۔ یہاں یہ بات بھی قابل ذکر ہے کہ اس خاص مقصد کے لئے پاکستان میں تیار کردہ یہ اپنی نوعیت کا پہلا کمرشل ڈرون ہے، اس طرح فوڈ پانڈا مقامی ٹیکنالوجی کی ترقی میں بھی اپنا تعاون فراہم کررہا ہے۔
یہ بھی پڑھیں : اوآئی سی سی آئی نے توانائی کے شعبے میں طویل المدّتی اصلاحات کیلئے جرأت مندانہ اقدامات کی سفارش کردی
اس آزمائشی مرحلے کے موقع پر فوڈ پانڈا کے سی ای او، نعمان سکندر مرزا نے کہا، "فوڈ پانڈا کی بنیادی سوچ یہ ہے کہ جدت کا عمل جاری رکھے، نئے معیار قائم کرے اور ٹیکنالوجی کا فائدہ اٹھا کر لوگوں کی بدلتی ہوئی ضروریات پوری کرنے کے لئے بہترین حل تلاش کرے۔ اپنے صارفین کے لئے ڈرون ڈیلیوری شروع کرنے سے قبل، اس کے بدستور بہت سے ایسے پہلو ہیں جن کا تفصیلی جائزہ لینے کی ضرورت ہے، ان میں تکنیکی، انتظامی اور قانونی معاملات ہیں اور ہم ان کے حل کے لئے فعال ہیں۔ آج کی یہ کامیاب آزمائشی پرواز اور ڈیلیوری ہمارے لئے انتہائی حوصلہ افزا رہی ہے اور یہ کامیابی ثابت کرتی ہے کہ ہم درست اڑان کی جانب گامزن ہیں۔"
ڈپٹی کمشنر اسلام آباد، محمد حمزہ شفقات اور انکے آفس نے اس آزمائشی مرحلے کے لئے فوڈ پانڈا کے ساتھ اہم اشتراک کیا ہے اور ڈپٹی کمشنر اس افتتاحی تقریب میں مہمان خصوصی بھی تھے۔ انہوں نے اپنے خیالات کا اظہار کرتے ہوئے کہا، "ای کامرس اور ٹیکنالوجی کے استعمال سے شہریوں کو خدمات کی فراہمی کے ساتھ اسلام آباد کی سول انتظامیہ ایسے اداروں کو تعاون کی فراہمی کے لئے پرعزم ہے جو عوام کو بھرپور سہولت فراہم کرنے کے لئے اقدامات کرتے ہیں۔ اس آزمائشی منصوبے کو باقاعدہ فعال سروس میں ڈھالنے کے لئے ہم فوڈ پانڈا کے لئے نیک خواہشات کا اظہار کرتے ہیں۔"
اس افتتاحی تقریب میں بعض معروف شخصیات، ذرائع ابلاغ کے نمائندوں اور سوشل میڈیا کی قابل ذکر شخصیات نے بھی شرکت کی۔
ملک بھر میں 20ہزار سے زائد ریسٹورنٹ کے پارٹنرز اورہر ماہ لاکھوں لوگوں کو کھانا منزل مقصود پر پہنچانے کے ساتھ فوڈ پانڈا پاکستان کی سب سے بڑی ای کامرس اور آن لائن فوڈ ڈیلیوری کمپنی ہے۔ فوڈ پانڈا ہزاروں گھریلو شیفس کو اپنے روزگار کی فراہمی کا موقع فراہم کرتا ہے اور جب لوگ ان کا انتخاب کرتے ہیں تو پھر ڈیلیوری رائیڈرز کے لئے آمدن کے مواقع پیدا ہوتے ہیں۔ اس بارے میں مزید معلومات کے حصول کے لئے برائے کرم اس ای میل (press@foodpanda.pk) پر رجوع کریں۔
ایک تبصرہ شائع کریں